Tuesday, February 17, 2015

அரனின் அருளே அரண்

அரனின் அருளே அரண் 
[ சந்திர சேகராஷ்டகத்தின்  இனிமையான மெட்டில்
பாடும்வகையில் இந்த பஜனைப்பாட்டை எழுதி இருக்கிறேன் ;
இது தமிழாக்கம் அல்ல   ] 
                                                      
                                   


 அரவணைக்கும் அரனின் பஞ்சாக்ஷரத்தையோதுமன்பரை,
அரவணைக்கும் பரமனருளே அரணுமாகிக்காக்குமாம்!

லம்போதரனை நமக்களித்த
                  சிவனின் சன்னதி சேருவோம்;
 "சம்போ சிவ சம்போ"என்றே
                 ஜெபித்து அவனருள் கோருவோம்;
அம்பலத்தே ஆடும் அரனின்
                அம்புயப்பதம் பற்றுவோம்;
 நம்புமடியார் நலனைக்காக்கும்
                 நாதனாலயம் சுற்றுவோம் .
                       (அரவணைக்கும்..)

 மதிமயக்கி மோகமூட்டிட
               மலர்க்கணைகளை ஏவிய
மதனின்சதியால் மௌனம்கலைய
               வெகுண்டெழுந்து சீறியே,
 நுதல்கண்ணால் ரதிபதியை எரித்த
               ஈசன்லீலையை எண்ணுவோம்;
முதலும் முடிவும் எதுவுமற்றவன்
               பதத்தைப்பூஜை பண்ணுவோம்.
                                   (அரவணைக்கும்..)

தோகைமயிலோன் தந்தை சோம
                     சேகரன் தாள்தழுவுவோம்;
 நாகபூஷணன் பதத்தினை நம்
                       நயனநீரால் கழுவுவோம்;
தேகமெங்கும் நீறுபூசும்
                       நாதனருளைப்பருகுவோம்;
 ரோகம்நீக்கும் ரிஷபவாகனன்
                      கிருபையை எண்ணி உருகுவோம்.
                                             (அரவணைக்கும்..)

 கையில்கனலை ஏந்தும் கயிலை
                  நாதன்  தாளினைப்போற்றுவோம்;
மெய்யில்பாதியை மனைவிக்கீந்தவன்
                  மகிமையைப்பறை சாற்றுவோம்;
வையமுய்ய நஞ்சை உண்டவன்
                  நிமலபாதம் சேருவோம்;
ஐயனின் ஐந்தெழுத்து மந்திரம்
                 ஓதியே கடைதேறுவோம்;
                                     (அரவணைக்கும்..)

 மங்களந்தரும் மங்கைப் பங்கனின்
                      பங்கயப்பதம் நாடுவோம்;
 திங்கள்தங்கிடும் சடையனாம் சிவ
                     சங்கரன் புகழ்பாடுவோம்;
 பொங்கும் கங்கையைத்தலையில் தாங்கிய
                      லிங்கரூபனை வாழ்த்துவோம்;
 செங்கண்மால் திருத்தங்கையின்பதி
                         தாளிலே தலைதாழ்த்துவோம்;
                                                      (அரவணைக்கும்..)
    

Friday, April 19, 2013

ஸ்ரீசாயிராமநவமி பஜன்


சாயி இருக்க பயமேன் ?

சாயி இருக்க ,சாயி இருக்க,
 சாயி இருக்க பயமேன் ?

சாயி இருக்க ,சாயி இருக்க,
 சாயி இருக்க பயமேன் ?

 தஞ்சம் என்றே சரண் புகுந்தோர்க்கு
அஞ்சேல் என்றே அபயம் அளிக்கும்
சாயி இருக்க ,சாயி இருக்க,
சாயி இருக்க பயமேன் ?


 
வேம்படிநிழலில் காட்சி அளித்து
இடிந்தமசூதியில் எளிமையாய் வாழ்ந்த

சாயி இருக்க ,சாயி இருக்க,
சாயி இருக்க பயமேன் ?

 செங்கல்லைத்தன் தலையணையாக்கி
கந்தல்கோணியில் படுத்த பக்கிரியாம்

சாயி இருக்க ,சாயி இருக்க,
 சாயி இருக்க பயமேன் ?


 
திருகையால் கோதுமை மாவை அரைத்து
விடநோய்நீக்கி ஜனநலம் காத்த

சாயி இருக்க ,சாயி இருக்க,
 சாயி இருக்க பயமேன் ?

நெருப்புக்குண்டமாம் தூனியின் உதியை
திருநீறாக அளித்து ரக்ஷிப்பவராம்

சாயி இருக்க ,சாயி இருக்க,
 சாயி இருக்க பயமேன் ?

நீரினை ஊற்றி தீபத்தை ஏற்றி
பாரெங்கும் ஞான ஒளியைப்பரப்பிய 

சாயி இருக்க ,சாயி இருக்க,
சாயி இருக்க பயமேன் ?
 

 சித்தமலமகற்றி பக்திவழிகாட்டி
முக்தி அளித்திடும் தத்தாத்ரேயராம்

சாயி இருக்க ,சாயி இருக்க,
 சாயி இருக்க பயமேன் ?

 அன்பரின் முன்னைவினைகள் முறித்து
 துன்பம்யாவும் துடைக்கும் துணைவராம்

சாயி இருக்க ,சாயி இருக்க,
 சாயி இருக்க பயமேன் ?

 சுயநலமின்றி சேவைபுரிவோரின்
 துயரங்கள் போக்கி அருள்புரிபவராம்

சாயி இருக்க ,சாயி இருக்க,
 சாயி இருக்க பயமேன் ?


தீனரைத்தாக்கும் ஈனரைத்திருத்தி
ஞானம் ஊட்டி நல்வழி காட்டும் 

சாயி இருக்க ,சாயி இருக்க,
 சாயி இருக்க பயமேன் ?

 இனம் மதம் மொழி எனும் பேதங்களின்றி
அனைவர்க்கும் அருளும் அன்புசாகரமாம் 

சாயி இருக்க ,சாயி இருக்க,
 சாயி இருக்க பயமேன் ?


 

Tuesday, March 26, 2013

வள்ளித்திருமணம்


(நன்றி:google)
வள்ளித்திருமணம்

மால்மகளாய்த் தவமிருந்து
மான்மகளாய் மண்ணில் வந்து
குறமகளாய் வளர்ந்தவள்ளி
மணமகளானாள்!-இன்று சிவசக்தித் தம்பதியின்
மருமகளானாள் !

புனங்காத்த புனிதையவள்
அதரத்திலோ "ஆலோலம்"
இதயமெல்லாம் குகக்கோலம்
வரைந்து நின்றாள் !-இன்று காதல்பரிசாய்க் கந்தன்
கரந்தனை வென்றாள் !

ஆணழகன் ஆறுமுகனைக்
காணக் கண் துடிதுடிக்க
நாணம் நிலம் நோக்கி இழுக்க
நாணலானாள் !-நாதன் நாண்  முடிக்க நங்கை இதய
ராணியானாள் !




 

Sunday, March 17, 2013

கந்தன் என் கைதி !



கந்தன் என் கைதி !
(subbusir  sings:
http://www.youtube.com/watch?v=qyS_GlJ9Yeg&list=UUw4TCj3_an8TqdGY6TNaixA&index=1 )

பிரணவத்தின் பொருளை  விளக்காத அயனைச் 
சிறையிலிட்ட சண்முகா !
கானத்தமிழ்க் கயிற்றால் கட்டி உனை என்னுள் 
கைது செய்தேன் குமரா!
 
அரனுக்கு ஏரகத்தில் பிரணவம் விளக்கப் பரம 
குருக்கோலம் பூண்ட குகா!
தந்தையைப் பூசிக்கும் மகனாய்ச் செந்தூரிலுனைக் 
கண்டதும் ஆஹா!ஆஹா!
கானத்தமிழ்க் கயிற்றால் கட்டி உனை என்னுள்
கைது செய்தேன் குமரா!

கிழவனாய் வள்ளியுடன் லீலைகள் புரிந்த 
அழகனே!ஆறுமுகா!
குழந்தைக்குறும்பனாய் அவ்வைக்கு நீகாட்டும் 
கோலமோ ஆஹா!ஆஹா!
கானத்தமிழ்க் கயிற்றால் கட்டி உனை என்னுள்
கைது செய்தேன் குமரா!

கோவணாண்டியாய் ஆவினன்குடிதனில் 
மேவும் பாலமுருகா!
சுரமகள் ,குறமகள் பதியாய் தணிகையிலுன் 
தரிசனம் ஆஹா!ஆஹா!
கானத்தமிழ்க் கயிற்றால் கட்டி உனை என்னுள்
கைது செய்தேன் குமரா!







 

Sunday, March 10, 2013

ஜம்புகேஸ்வர ஸ்தோத்ரம்

 

ஜம்புகேஸ்வர ஸ்தோத்ரம் 
(SUBBUSIR  sings:
http://www.youtube.com/watch?v=IJLCeBQNCuY&list=UUw4TCj3_an8TqdGY6TNaixA&index=1 )

லலாட லோசன ஜ்வாலா  நிர்தக்த   ஸ்மர  விக்ரஹ |
நமஸ்தே கரிசர்மாத்த வாஸஸே க்ருத்தி வாஸஸே||

கரும்புவில்லேந்தும் காமனைக் கனல்விழியால் 
                எரித்தவா!யானையூரீசா!
சரணமையா !கரித்தோலினை ஆடையாய்த்  
                 தரித்தவா!க்ருத்திவாசா !

யஸ்சார்மணேன  பததஸ் சக்ஷூஷீ  நீலலோஹித | 
தத்தாம பவதோ நித்யம் சதா பஸ்ச்யந்தி ஸூரய:||

பாரோர் புறக்கண்ணால் பார்க்க இயலா உன் 
                பேரொளி வீசும் உருவை ,
பற்றறுத்தஞானியர் அகக்கண்களால் கண்டு 
               களித்திருப்பர் காலமெல்லாம்.

ஸ்ருஷ்ட்யர்த்தம் பிரம்ம ரூபஸ்ஸன் ஸ்தித்யர்த்தம் ஜகதாமபி|
தவைவ ஹரநித்யோயம் ஆத்மா நாராயண:பர:|| 

ஆக்குந்தொழில் புரிய வாகீசன் வடிவெடுத்த 
            அருட்பெருஞ்ஜோதிச் சுடரே!
ஆக்கிய அனைத்தையும் அரிவடிவிலே வந்து
             காத்தருளும் கருணைக் கடலே! 

அம்ருதேஸ்வர பூதேச ஸ்ருஷ்டி ஸ்தித்யந்த காரண|
யத்தவ  ஸ்தானமனகம் தத்விஷ்ணோ :பரமம் பதம் ||

அப்புலிங்கமாய் ஆனைக் காவில் அருள்பவனே!
             பூதகணங்களின் தலைவனே!
முத்தொழிலுக்கும் காரணனே!உன்தலம் 
             நாடிடுவான்  நாரணனே! 

பக்தாந்த:கருணாம்போஜ விகாஸன கரத்விஷே|
அம்ருதேச நமஸ்தேஸ்து ருத்ராய ஸ்திர தன்வனே||

இதயந்தனை ஈர்த்து அடியார் அகங்குளிர 
            அருளும் அம்ருதேச்வரா!
எதிரி நடுநடுங்க வில்லேந்தி காட்சிதரும் 
            ருத்திரனே!மகேஸ்வரா!

ஜடாமகுட நிஷ்யந்த கங்கா ரிங்கத் ஸுதாம்சவே|
நமோ அம்ருதஸ்வரூபாய லிங்காயாமல தேஜஸே||

பொங்கிவரும் கங்கையை தடுத்திட மதியினை 
            சிரந்தனில் தரித்த சிவனே!
ஜம்புலிங்கமாய்  ஜொலிக்கும் ஜோதியே!எளியனுக்கு 
           அரணுந்தன்  தூய பதமே!

அமராதிப கோடீர நிர்க்ருஷ்டாங்க்ரி ஸரோருஹ |
ஸ்வபக்த ஜனுஷே துப்யம் மஹஸே மஹதே நம:||

வணங்கும் வாசவனின் மகுடம் மெல்ல வருட
                       விளங்கும் மலர்ப்பாதனே! 
சரணம்,அன்பர்க்கு லிங்கமாய்  திருக்காட்சி  
                      அருளும் ஜம்புநாதனே!

தீவ்யத்ஸுராசஸுர வதூ சீமந்த மணி ரஷ்மிபி:|
நீராஜித பதாப்ஜாய  தேவாய மஹதே நம :|| 

உனைப் பணிந்திடும் தேவ அசுர அணங்குகள் 
                   அணியும் ரத்னமணி ஒளியிலே 
நனைந்து நீராடிடும் நின் மலர்ப்பதங்களை 
                    பணிகின்றேன் ,பரமேஸ்வரா !


            




           





 

Monday, February 25, 2013

அழகா !வா!


அழகா !வா!
(SUBBUSIR sings:
http://www.youtube.com/watch?v=ZLZJ9NlBN9Q&list=UUw4TCj3_an8TqdGY6TNaixA&index=1

கயிலாய நாதருக்கு  
உயிரொலியை விளக்கியவா !
அயிலேந்தி அழகா வா!வா!!-வண்ண 
மயிலேறி  முருகா !வா!வா !

மங்களச் செவ்வாய்க்கோள் கவ்விய வெண்திங்களென 
குங்குமச்செந்நிற முகத்தில் வெண்ணீற்று நுதல் ஒளிர 
சிங்கார வேலா நீவா !-சிவ
சங்கரியின் செல்வா நீவா!
அயிலேந்தி அழகா வா!வா!!-வண்ண
மயிலேறி முருகா !வா!வா !

தன்னினமென்றே மயங்கி விண்மீன்கள் அண்மைவர
மின்னும் பன்னிரு விழிகள் தண்ணருளைத்தான் பொழிய
கங்காதரன் மகனே !வா!-சூர 
சங்காரம் செய்தவனே!வா!
அயிலேந்தி அழகா வா!வா!!-வண்ண
மயிலேறி முருகா !வா!வா !

தையல் தேவகுஞ்சரியும் ஒயிலாய் ஒருபுறமிருக்க,
மையலிலே மான்மகளும் மயங்கி மறுபுறமிருக்க,
ஒய்யார நடைபோட்டு வா !இந்த 
வையமெல்லாம் உய்ய நீ வா!
அயிலேந்தி அழகா வா!வா!!-வண்ண
மயிலேறி முருகா !வா!வா !

கயிலாய நாதருக்கு
உயிரொலியை விளக்கியவா !
அயிலேந்தி அழகா வா!வா!!-வண்ண
மயிலேறி முருகா !வா!வா !

Sunday, January 27, 2013

அன்னை அளித்த அருள் வேல்!


அன்னை அளித்த அருள் வேல்!
(A.O.L"ஜெய்,ஜெய் ராதா ரமண ஹரி போல் " என்ற

பஜனைப்பாட்டின் மெட்டு இந்தப் பாட்டுக்கு பொருந்தும் ;
பாடிப்பாருங்க வேலவனை நினைத்தபடி !)
 

அன்னை அன்பாய் அளித்த அருள்வேல்!
வண்ணமயில்வாகனன் விசாகன் வேல்!
முன்னைவினையாவையும் முறிக்கும்வேல்!
இன்னல்நீக்கி இதமளிக்கும் வேல்!

அன்னை அன்பாய் அளித்த அருள்வேல்!
வண்ணமயில்வாகனன் விசாகன் வேல்!

அருள்வேல்,அழகுவேல்,
முனைவேல்,முருகன்வேல்!
பெருவேல்,புனிதவேல்,
திருவேல்,துணைவன் வேல்!

அன்னை அன்பாய் அளித்த அருள்வேல்!
வண்ணமயில்வாகனன் விசாகன் வேல்!

ஆறுபடைவீடமரும் குகன்வேல்!
ஈராறுகண்ணனின் கதிர்வேல்!
நீறணியும் நிமலன் வீரவேல்!
ஸுரசம்ஹாரனின் சக்திவேல்!

அன்னை அன்பாய் அளித்த அருள்வேல்!
வண்ணமயில்வாகனன் விசாகன் வேல்!

கூர்வேல்,குகன்வேல்,
கதிர்வேல்,குமரன்வேல்!
வீரவேல்,வெற்றிவேல்,
தூய வேல்,திவ்ய வேல்!

அன்னை அன்பாய் அளித்த அருள்வேல்!
வண்ணமயில்வாகனன் விசாகன் வேல்!

வள்ளிமணவாளனின் வல்வேல்!
தேவயானிநேசனின் நல்வேல்!
அண்டினோர்க்கருளும் கருணைவேல்!
கண்கண்டகடவுள் கந்தன்வேல்!

அன்னை அன்பாய் அளித்த அருள்வேல்!
வண்ணமயில்வாகனன் விசாகன் வேல்!

வல்வேல்,வெள்ளிவேல்,
நல்வேல்,வஜ்ரவேல்!
வடிவேல், கருணைவேல்,
கந்தன்வேல்,கனகவேல்!

அன்னை அன்பாய் அளித்த அருள்வேல்!
வண்ணமயில்வாகனன் விசாகன் வேல்!
வண்ணமயில்வாகனன் விசாகன் வேல்!
வண்ணமயில்வாகனன் விசாகன் வேல்!


Tuesday, December 11, 2012

உமை கவிதை செய்கின்றாள் !

           [Bharathi.jpg]
படத்துக்கு நன்றி: http://photobucket.com/images/women%20power/

உமை கவிதை செய்கின்றாள் !
(பாரதியாரின்  பிறந்தநாளான  இன்று (11-12-12)
பாஞ்சாலி சபதத்தில் "மாலை வருணனை "யில்  
ஒரு பகுதி கீழே:)

பாரடியோ!வானத்திற் புதுமையெல்லாம் .
        பண்மொழீ !கணந்தோறும் மாறி மாறி
ஓரடி மற்றோரடியோ டொத்தலின்றி
       உவகையுற நவநவமாத் தோன்றுங் காட்சி;
யாரடி இங்கிவைபோலப் புவியின் மீதே
      எண்ணரியப் பொருள் கொடுத்தும் இயற்றவல்லார் !
சீரடியால் பழவேத முனிவர் போற்றுஞ்
     செழுஞ்சோதி வனப்பையெல்லாம் சேரக்காண்பாய் !

கணந்தோறும் வியப்புக்கள் புதிய தோன்றும்;
      கணந்தோறும் வெவ்வேறு கனவு தோன்றும் ;
கணந்தோறும் நவநவமாம் களிப்பு தோன்றும்
      கருதிடவும் சொல்லிடவும் எளியதோ?ஆங்கே ,
கணந்தோறும் ஒரு புதிய வண்ணங்காட்டி
      காளிபராசக்தி அவள் களிக்குங்கோலம்
கணந்தோறும் அவள் பிறப்பாள் என்று மேலோர்
      கருதுவதன் விளக்கத்தை இங்குக்காண்பாய்.

அடிவானத்தே அங்கு பரிதிக்கோளம்
        அளப்பரிய விரைவினோடு சுழலக் காண்பாய் .
இடிவானத்தொளிமின்னல் பத்துக்கோடி
         எடுத்தவற்றை ஒன்றுபட உருக்கி வார்த்து ,
முடிவானவட்டத்தைக்காளி ஆங்கே
       மொய்குழலாய்!சுற்றுவதன் மொய்ம்பு காணாய்!
வடிவானதொன்றாகத் தகடிரண்டு
        வட்டமுறச் சுழலுவதை வளைந்து காண்பாய்.

அமைதியோடு பார்த்திடுவாய் மின்னே!பின்னே 
          அசைவுறுமோர் மின்செய்த வட்டு;முன்னே ,
சமையுமொரு பச்சைநிற வட்டங்காண்பாய்;
           தரணியிலிங்கிதுபோலோர்  பசுமைஉண்டோ?
இமைகுவிய மின்வட்டின் வயிரக்கால்கள் 
            எண்ணில்லாதிடையிடையே எழுதல் காண்பாய்.
உமை கவிதை செய்கின்றாள்,எழுந்து நின்றே 
உரைத்திடுவோம்,"பல்லாண்டு வாழ்க!"என்றே.
         









 

Tuesday, November 27, 2012

கார்த்திகை பஜனைப்பாட்டு

 
கார்த்திகை பஜனைப்பாட்டு
(Subbusir sings:
http://www.youtube.com/watch?v=yUMK8rcZeDY&feature=player_embedded)

அகல் விளக்கு ஏற்றி வைத்தோம் ,அலைவாய் அழகா!
அஞ்ஞான இருள் அழிப்பாய் ,குன்றாடும் குழகா!
தினையுடன் தேன் உனக்களித்தோம் ,வனமாலிமருகா!
துணைவருவாய் ,வினையறுப்பாய்,முனைவேல்முருகா!
அலைவாய் அழகா!குன்றாடும் குழகா!
வனமாலிமருகா!முனைவேல்முருகா!

ஜகம்புகழும் சிவைமகனே!சுப்பிரமணியா!
தகப்பனுக்குப் பாடஞ்சொன்ன ஒப்பற்ற தனயா!
திகழாறு முகத்தானே!கார்த்திகேயா !
அகம் அமர்ந்து சுகமருள்வாய்,காங்கேயா!
சுப்பிரமணியா!  ஒப்பற்ற தனயா!
கார்த்திகேயா !காங்கேயா!

குஞ்சிதபாதன்மைந்தா!குஞ்சரி காந்தா!
வஞ்சிநாதா!குறிஞ்சிவேந்தா!சண்முகசேந்தா!
சிந்தையிலுன் மந்திரமே,கந்தா!அனந்தா!
உந்தன் திருக்காட்சி தினம் காணும் வரம்தா!
குஞ்சரி காந்தா!சண்முகசேந்தா!
கந்தா!அனந்தா!காணும் வரம்தா!
உனைக்காணும் வரம் தா !
தினம் காணும் வரம் தா!
















 

Monday, November 19, 2012

ஷண்முகனுக்கு ஷடாக்ஷரத்துதி




ஷண்முகனுக்கு ஷடாக்ஷரத்துதி 

சக்தி  புத்திரனை சித்தத்தில் நிறைப்போம் .
சதாசிவமகனின் திருத்துதி இசைப்போம் .
சண்முகன் நந்நாமம் நெஞ்சில் நினைப்போம் .
சகாரமுறை குகன் மந்திரம் உரைப்போம்.

சரவணபவ ஓம் சரவணபவ ஓம் சரவணபவ ஓம் சரவணபவ ஓம்
சரவணபவ ஓம் சரவணபவ ஓம் சரவணபவ ஓம் சரவணபவ ஓம்

ரத்தவர்ணனவன் திருப்பதம்  தொழுவோம் .
ரங்கன் மருகனவன் திருப்பெயர் மொழிவோம் .
ரத்னவேலுடையோன் முன் கை குவிப்போம்.
ரகாரமுறை குகன் மந்திரம் ஜெபிப்போம் .

சரவணபவ ஓம் சரவணபவ ஓம் சரவணபவ ஓம் சரவணபவ ஓம்
சரவணபவ ஓம் சரவணபவ ஓம் சரவணபவ ஓம் சரவணபவ ஓம்

வள்ளிநாயகன் பதம் இதயத்தில் பதிப்போம்.
வரதாயகன்  புகழ் பாடித் துதிப்போம்.
வடிவேலவன் நாமம் நாளெல்லாம் நவில்வோம்.
வகாரமுறை குகன் மந்திரம் பயில்வோம்.

சரவணபவ ஓம்சரவணபவ ஓம் சரவணபவ ஓம் சரவணபவ ஓம்
சரவணபவ ஓம் சரவணபவ ஓம்சரவணபவ ஓம் சரவணபவ ஓம்

கணபதிக்கிளையோனின்  வெண்ணீறு  அணிவோம் .
குணக்குன்றாம் குமரனின் இணையடி பணிவோம்.
தணலாய் உதித்தோன்  அருட்சுனையினில் நனைவோம் .
ணகாரமுறை குகன் மந்திரம் நவில்வோம் .

சரவணபவ ஓம்சரவணபவ ஓம் சரவணபவ ஓம் சரவணபவ ஓம்
சரவணபவ ஓம் சரவணபவ ஓம்சரவணபவ ஓம் சரவணபவ ஓம்

பரமகுருவின் திருப்பொடி  புனைந்திடுவோம். 
பன்னிருகண்ணனின் பதம் பரவிடுவோம். 
பக்தவத்சலனைப் பாடிப் போற்றிடுவோம். 
பகாரமுறைவோன் பேர்  உருவேற்றிடுவோம். 

சரவணபவ ஓம் சரவணபவ ஓம் சரவணபவ ஓம் சரவணபவ ஓம்
சரவணபவ ஓம் சரவணபவ ஓம் சரவணபவ ஓம் சரவணபவ ஓம்


வண்ணமயில் வாகனனை வணங்கிடுவோம். 
வல்வினையறுப்போனை  வழிபடுவோம். 
வள்ளலை வாழ்த்தித் துதி பாடிடுவோம்.
வகாரமுறைவோன் மந்திரம் ஓதிடுவோம்.  

சரவணபவ ஓம் சரவணபவ ஓம் சரவணபவ ஓம் சரவணபவ ஓம்
சரவணபவ ஓம் சரவணபவ ஓம் சரவணபவ ஓம் சரவணபவ ஓம்




 

Saturday, November 17, 2012

ஈசன்மகனே !வா!





ஈசன்மகனே !வா!
(Subbusir sings:
http://www.youtube.com/watch?v=8Z13vf2HFhY&feature=em-share_video_user )

 பாசத்தினைப் பிசைந்தேன் , பாமலர்த்தேனூற்றி ;
ஈசன்மகனே !ருசிக்க வா!
நேசமனமடியமர்த்தி ஆசையாய் ஊட்டிவிடக் 
காத்திருக்கேன் ;நீ புசிக்கவா!

கயிலாயரின்  அழல் நயனத்தில் பூத்தவனே!
கயல்விழியாள் தவப்பயனே!வா!
உயிரொலியின் பொருள் வினவி,அயனின் செருக்கழித்தவனே!
மயிலேறி நீ விரைந்து வா!

பாசத்தினைப் பிசைந்தேன் ,பாமலர்த்தேனூற்றி ;
ஈசன்மகனே !ருசிக்க வா!

வெண்ணீற்று மணங்கமழும்  பொன்னெழில் மேனியனே!
பன்னிருகண்ணனே!வா!
மின்னலென  ஒளிரும் உன்னன்னையின்  வேலேந்தி 
கண்மணியே!சுப்ரமணியா!வா!

பாசத்தினைப் பிசைந்தேன், பாமலர்த்தேனூற்றி ;
ஈசன்மகனே !ருசிக்க வா!

ஈசனுக்கு  ஏரகத்தில்   ஆசானாய்ப்  பாடஞ்சொன்ன 
மாசில்லாமணியே !நீவா!
காழிச்சேயாய்த் தமிழில் வீழிநாதன்  புகழிசைத்த 
வேலாயுதா !வேகம் வா !

பாசத்தினைப் பிசைந்தேன் , பாமலர்த்தேனூற்றி ;
ஈசன்மகனே !ருசிக்க வா!
நேசமனமடியமர்த்தி ஆசையாய் ஊட்டிவிடக்
காத்திருக்கேன் ;நீ புசிக்கவா!


 

Wednesday, October 31, 2012

ஆறெழுத்தோது!



               ஆறெழுத்தோது !

இணையுன் மனத்தை குகனின்  பதமலரோடு !
அனைத்தும்மறந்து அந்த ஆறெழுத்தோது !
ஓம் சரவணபவா!ஓம் சரவணபவா!ஓம் சரவணபவா!

நாதம்பிறந்ததவன் பொருள்சொன்ன பிரணவத்தில் !
கீதம்பிறந்ததவன் கிண்கிணிக்கழலொலியில்!
வேதங்கள்வாழ்த்திடும் வண்ணமயிலோனவன்
பாதங்களே படகாம் பிறவிக்கடல்தாண்ட!

இணையுன் மனத்தை குகனின் பதமலரோடு !
அனைத்தும்மறந்து அந்த ஆறெழுத்தோது !
ஓம் சரவணபவா!ஓம் சரவணபவா!ஓம் சரவணபவா!

பாயும்புலியுமோர் பூனைபோல் பதுங்கிடும்,
நோய்களும்பேய்களும் அண்டாமல் ஒதுங்கிடும்,
தீயுந்தணிந்து இளந்தென்றலாய்த்தழுவிடும்,
ஓயாதவன்நாமம் ஓதியே  வழிபட்டால்!

இணையுன் மனத்தை குகனின் பதமலரோடு !
அனைத்தும்மறந்து அந்த ஆறெழுத்தோது !
ஓம் சரவணபவா!ஓம் சரவணபவா!ஓம் சரவணபவா!


 
நடந்தாலவன் கோயில் நோக்கிமட்டும் நட!
படுத்தாலவன்பாதம் பணியமட்டும் படு !
அறிவிலியே! வாய்திறந்தால் கடைதேற்றும்
ஆறெழுத்தையோத மட்டும் அசை உன் நா !

இணையுன் மனத்தை குகனின் பதமலரோடு !
அனைத்தும்மறந்து அந்த ஆறெழுத்தோது !
ஓம் சரவணபவா!ஓம் சரவணபவா!ஓம் சரவணபவா!


 
முகங்கள் மூவிரண்டுமுன் அகத்தினில் நிலைத்திடில்
நிகழ்பவையாவும் சுபமே!-இடர்நீக்கும்
விகடச்சக்கரன்தம்பி விரைகழல்பற்றியே
புகலடைந்தோர் வாழ்வில் பொங்கிடும்மங்களமே !

இணையுன் மனத்தை குகனின் பதமலரோடு !
அனைத்தும்மறந்து அந்த ஆறெழுத்தோது !
ஓம் சரவணபவா!ஓம் சரவணபவா!ஓம் சரவணபவா!

 

Monday, October 22, 2012

வாணியை வேண்டுதல்



வாணியை வேண்டுதல் 
(பாரதியாரின்  பாஞ்சாலி சபதத்திலிருந்து  கிடைத்த 
 சரஸ்வதி  துதி )

தெளிவுறவே அறிந்திடுதல்;தெளிவுதர 

            மொழிந்திடுதல்;சிந்திப்பார்க்கே 

களிவளர உள்ளத்தில் ஆனந்தக்கனவு பல 

              காட்டல் ,கண்ணீர்த் 

துளிவர உள்ளுருக்குதல், இங்கிவையெல்லாம்

               நீ அருளும் தொழில்களன்றோ ?

ஒளிவளருந்தமிழ்வாணீ !அடியநேற் 

                 கிவையனைத்தும்  உதவுவாயே.
 

Thursday, October 18, 2012



நவராத்திரி துதி பாடுவோம்

கொலுவைத்து அன்னையைக் கொண்டாடுவோம்.-அவள்
மலர்ப்பதம் பணிந்தே துதி பாடிடுவோம் ;

பங்கயக்கரங்களில் பூங்கணை ஐந்தும் ,
செங்கரும்பும் பாசாங்குசமும் தாங்கி
அன்பால் நம்மை ஆண்டருள் புரியும்
அம்பிகையவளின் ஒன்பது இரவும்
கொலுவைத்து அன்னையைக் கொண்டாடுவோம்.-அவள்
மலர்ப்பதம் பணிந்தே துதி பாடிடுவோம் ;

முதல் மூன்றிரவினில் துர்க்கையாகி
தீயசக்திகளை மாய்த்து ஒழிக்க
நெஞ்சுறமும் உடல்பலமும் அருளும்
கருணாசாகரி,பரமேஸ்வரியை

கொலுவைத்து அன்னையைக் கொண்டாடுவோம்.-அவள்
மலர்ப்பதம் பணிந்தே துதி பாடிடுவோம் ;

இடை மூன்றிரவினில் திருமகளாகி
குறைவற்றதனமும் நிறைந்தமனமும்
இல்லார்க்கீயும் வள்ளல்குணமும்
நமக்கருளும் இமகிரிமகளவளை
கொலுவைத்து அன்னையைக் கொண்டாடுவோம்.-அவள்
மலர்ப்பதம் பணிந்தே துதி பாடிடுவோம் ;

கடை மூன்றிரவினில் கலைமகளாகி
அஞானமகற்றி மெய்ஞானமூட்டி
ஆயகலைகள் அறுபத்துநான்கும்
அருளும் தாய் அபிராமவல்லியை

கொலுவைத்து அன்னையைக் கொண்டாடுவோம்.-அவள்
மலர்ப்பதம் பணிந்தே துதி பாடிடுவோம் ;

மங்கலந்தரும் சங்கரன் மங்கையவள்;
சஞ்சலந்தீர்க்கும் ரங்கனின் தங்கையவள்;
என்றும் வற்றா கருணைக் கங்கையவள்;
நம் நலங்காக்கும் நவராத்திரி நங்கையவள்.

கொலுவைத்து அன்னையைக் கொண்டாடுவோம்.-அவள்
மலர்ப்பதம் பணிந்தே துதி பாடிடுவோம் ;

Wednesday, September 19, 2012

தெருமூலை தெய்வம்


 தெருமூலை தெய்வம்
(மெட்டு -அமைதியான நதியினிலே ஓடம்)

தெருமூலை தெய்வம் பிள்ளையாரு--அரச
நிழலில் குந்தி நம்மை ஆள்கிறாரு;
எளியவர்க்கு எளியவராய்
எலிமேலே ஏறிவரும்
கலியுகத்துக்கடவுள் பிள்ளையாரு --எங்கள் (தெருமூலை)

சதுர்த்தியிலே சனங்களெல்லாம்
கூடிநின்று குடைபிடிக்க,
ஊர்வலமாய் சுத்திவந்து
தீர்த்துவைப்பார் நம்மகுறை;
காத்திடுவார் கடைசி வரை
தெருமூலை தெய்வம் பிள்ளையாரு-.....

உள்ளத்திலே அவரை எண்ணி
புல்லைப்போட்டு பூசைபண்ணி

படைத்திடுவோம் தேங்காதண்ணி;
முடித்துவைப்பார் எடுத்தபணி ;
தடங்கலே வராது இனி !
தெருமூலை தெய்வம் பிள்ளையாரு-



Tuesday, September 11, 2012

பாரதியாரின் முருகன்பாட்டு

[Bharathi.jpg]                                                              
பாரதியாரின் முருகன்பாட்டு
(  11th செப்டெம்பர் பாரதியாரின் நினைவுநாள்   )
subbusir sings:
http://kandhanaithuthi.blogspot.in/2012/09/blog-post.html

வீரத்திருவிழிப் பார்வையும் -வெற்றி
வேலும் மயிலும் என் முன்னின்றே -எந்த
நேரத்திலும் என்னைக் காக்குமே;-அன்னை
நீலி பராசக்தி தண்ணருட்-கரை
ஓரத்திலே புணை கூடுதே;-கந்தன்
ஊக்கத்தை என்னுள்ளம் நாடுதே;-மலை
வாரத்திலே விளையாடுவான்-என்றும் 
வானவர் துன்பத்தைச் சாடுவான் . 

வேடர்கனியை விரும்பியே-தவ
வேடம்புனைந்து திரிகுவான்;-தமிழ்
நாடு பெரும்புகழ் சேரவே -முனி 
நாதனுக்கிம்மொழி கூறுவான் ;-சுரர் 
பாடு விடிந்து மகிழ்ந்திட -இருட் 
பாரமலைகளைச் சீறுவான் ;-மறை 
யேடு தரித்த முதல்வனும் -குரு 
வென்றிட மெய்ப்புகழ் ஏறுவான் . 
  
தேவர் மகளை மணந்திடத் -தெற்குத் 
தீவிலசுரனை மாய்த்திட்டான்;-மக்கள்
யாவருக்குந்தலை யாயினான்;-மறை
அர்த்தமுணர்த்து நல்வாயினான்;-தமிழ்ப்
பாவலர்க்கின்னருள் செய்குவான்;-இந்தப்
பாரில் அறமழை பெய்குவான்;-நெஞ்சின்
ஆவலறிந்தருள் கூட்டுவான்;-நித்தம்
ஆண்மையும் வீரமும் ஊட்டுவான்.

தீவளர்த்தே பழவேதியர் -நின்றன்
சேவகத்தின் புகழ் காட்டினார்;-ஒளி
மீவளருஞ்செம்பொன் நாட்டினார்-நின்றன்
மேன்மையினாலறம் நாட்டினார்;-ஐய!
நீவளருங்குருவெற்பிலே;-வந்து
நின்று நின் சேவகம் பாடுவோம் -வரம்
ஈவள்  பராசக்தி யன்னைதான்-உங்கள்
இன்னருளே யென்று நாடுவோம் -நின்றன் (வீரத்)

Thursday, August 23, 2012

நலந்தரும் தலம்


நலந்தரும் தலம்

( "கங்கைக் கரைத் தோட்டம்"..மெட்டில் பாடிப்பாருங்க )

அமரரைக்காக்க
       அசுரரையழித்த
குமரன் அமர்ந்த தலம் ..செந்தூர்
         நலந்தரும் புனித தலம்.
சீரலைவாய் என   
          பாரோர்புகழும்
பேருடன் திகழும் தலம் ..செந்தூர்
         ஆழ்கடல் சூழ்ந்த தலம்

சூரபத்மன் தன்னைக்கொன்று,
வெற்றிமாலை சூடிக்கொண்டு,
செந்தில்மலை வந்தகந்தன்
தந்தையாரைப்  பூஜைசெய்ய
பூவேந்தும்  கரத்தானாய்  
பவ்யதிருக்கோலம்
காட்டும் திவ்யதலம்..செந்தூர்
பக்தரின் புண்ய தலம்.

அமரரைக்காக்க
               அசுரரையழித்த
குமரன் அமர்ந்த தலம் ..செந்தூர்
               நலந்தரும் புனித தலம்.

பன்னிருகரத்தவனை
பயபக்தியாய்ப்பணிந்து,
பன்னீரிலையில் தந்த
வெண்ணீற்றினைஅணிந்தால்
அல்லலெல்லாம்  நீங்கும்;
செல்வவளம் ஓங்கும்;
 நிழலெனத் துணைவருவான் -கந்தன்
கழலினில் புகல்  தருவான் .

அமரரைக்காக்க
        அசுரரையழித்த
குமரன் அமர்ந்த தலம் ..செந்தூர்
          நலந்தரும் புனித தலம்.



 

Friday, August 10, 2012

கனலாய் உதித்த அருட்புனல்




கனலாய் உதித்த அருட்புனல்
(subbu sir sings:
  http://www.youtube.com/watch?v=RBucGWKRJDo&feature=player_embedded )

புனல்சூடும் புராரியின்  நுதல்விழிதனிலே
கனலாயுதித்த புதல்வா!!
இணையில்லா உன் இணையடிதன்னைப் 
பணிவோர்க்குப் புகல்தா!

கனியால் கனிந்து கோவணாண்டிக்கோலம்
 புனைந்த பழநிபாலா!
உனை  நினைந்துருகும் பக்தரின் முந்தை
வினைமுறி  வடிவேலா!


புனல்சூடும் புராரியின்  நுதல்விழிதனிலே
கனலாயுதித்த புதல்வா!
இணையில்லா உன் இணையடிதன்னைப்
பணிவோர்க்குப் புகல்தா!

ப்ரணவப்பொருள்  சொல்லி பரமகுருவான 
புனிதா!சுவாமிநாதா!
அனுதினம் ஆறெழுத்தை ஜெபிப்போர்க்கு 
இனி பிறவா வரம்  தா ! 


புனல்சூடும் புராரியின்  நுதல்விழிதனிலே
கனலாயுதித்த புதல்வா!
இணையில்லா உன் இணையடிதன்னைப்
பணிவோர்க்குப் புகல்தா!

தினையுடன் மனமும் தந்த வனிதையை
மணந்த தணிகையழகா!
"துணைநீயே!"எனும் தீனரை அருளாலே 
அணைத்திடு!ஆறுமுகா

புனல்சூடும் புராரியின் நுதல்விழிதனிலே
கனலாயுதித்த புதல்வா!
இணையில்லா உன் இணையடிதன்னைப்
பணிவோர்க்குப் புகல்தா!







Tuesday, July 31, 2012

அக்னிப்பூவே!வந்தனம் !



அக்னிப்பூவே!வந்தனம் !

தென்றல் தாங்கிவர,கங்கை வாங்கித்தர,
கன்னியர் வளர்த்த அக்னிப்பூவே!
மன்றாடி மைந்தா!குன்றாடுங்கந்தா!
வந்தனம்!அமரர் படைக்கோவே!

புனலணியும் அரனின் அனல்விழிப்பொழிலில் 
         அரும்பிய ஞானக் கனற்போதே !
உனைப்பணிந்திடுவோர் மன இருள்தன்னை 
          மாய்த்திட வருவாய் மயில்மீதே! 

தென்றல் தாங்கிவர,கங்கை வாங்கித்தர,
கன்னியர் வளர்த்த அக்னிப்பூவே!
மன்றாடி மைந்தா!குன்றாடுங்கந்தா!
வந்தனம்!அமரர் படைக்கோவே!

நிலவணியும் நிமலன் நங்கையுறவின்றி
            விழியால் படைத்த அதிசயமே  !
கலியுக வரதா!மலரடி தொழுதோம்;
           அகற்றிடுவாய் எங்கள் பவபயமே!

தென்றல் தாங்கிவர,கங்கை வாங்கித்தர,

கன்னியர் வளர்த்த அக்னிப்பூவே!
மன்றாடி மைந்தா!குன்றாடுங்கந்தா!
வந்தனம்!அமரர் படைக்கோவே!






Tuesday, July 24, 2012

மயிலே!மனமார்ந்த நன்றி!



மயிலே!மனமார்ந்த நன்றி!
( "தீராத விளையாட்டுப் பிள்ளை " மெட்டு )


மயிலே! உனக்கு மிகவும்  நன்றி,--நாங்கள்
தவிக்கிறோம் உனைப்புகழத் தகுந்தசொல் இன்றி.[.மயிலே....]

கனிக்காக உன்மேல்புவி பவனி ...வந்த
கந்தன் கனிகிட்டாமல் சினந்தாண்டியாகி ,
தென்பழநிமலையில் எழுந்தருளி ...தமிழ்த்
தெய்வமாய்த் தமிழர்க்கு அருளவழிசெய்த

மயிலே உனக்கு மிகவும் நன்றி!

 பழனியிலே ஆண்டிக்கோலம்,..ஸ்வாமி

மலையிலே ஓங்காரம் விளக்குங்குருக்கோலம் ,
செந்தூரில் சிவபூஜைக்கோலம் ...என்று
கந்தனின் கோலம்பல காணவழிசெய்த

 மயிலே உனக்கு மிகவும் நன்றி!

 குன்றத்தில் சுரமகள் கணவன் ,..குறக்

கன்னியுடன் பழமுதிர்ச்சோலையில் முனிவன் , 
தணிகையில் வள்ளியின் துணைவன்,--என்று
குகனின் எழிற் கோலம்பல காணவழிசெய்த


மயிலே உனக்கு மிகவும் நன்றி,--நாங்கள்

தவிக்கிறோம் உனைப்புகழத் தகுந்தசொல் இன்றி.
மயிலே மனமார்ந்த நன்றி!!--வண்ண
மயிலே மனமார்ந்த நன்றி!!--தோகை
மயிலே மனமார்ந்த நன்றி!!

மனமார்ந்த நன்றி!!